Paylaga: “I-matuto ang inyong mga anak sa katarong”

Dili malalis nga naa lang gihapoy mga ginikanan hangtud karon nga kahibalo mobuhat ug bata pero dili kahibalo mobuhat ug tawo.

Sa kasaulogan sa Oktubre isip “Universal Children’s Month,” gi-aghat ni Vice Gov. Francisco Paylaga Jr. kining mga klaseha sa ginikanan sa pagmata, sa pag-usab sa dinalhan sa ilang mga anak, ug sa pagsilsil sa ilang alimpatakan sa mga maayong gawi labi na sa panahon nga linghod pa silag pangisip.

“Mga ginikanan, atong hunahunaon nga kining mga edara sa atong mga anak ang labing importante, mao ni ang formative years sa ilang pagkatawo. Kinahanglan nga matudloan sila sa hustong pamatasan kay importante sa bata ang upbringing sa panimalay,” matud pa niya.

Si Vice Gov. Paylaga ang speaker sa culmination program sa Universal Children’s Month nga gi-held sa Provincial Day Care Center adtong Biyernes. Iyang gipahinumdoman ang mga ginikanan nga 75% sa batasan ug personality sa tawo iyang makuha sa iyang panimalay ug sa giunsa siya sa pagpadako sa iyang mga ginikanan.

“Ang 25% iyang makuha sa edukasyon ug sa training, acquired na nga dugang sa iyang personalidad. So atong hinumdoman nga kung unsay attitude sa atong kabataan, automatically mo-reflect na natong mga ginikanan,” niya pa.

Mao nay giingon ni French writer and poet Charles Peirre Peguy nga “Ang tawo nga suklan ug anak, angay silotan tungod sa iyang paghimo ug anak nga mosukol ug amahan,” hitabo nga matud pa ni Paylaga, ang pagpadako sa bata pinaagi sa pagpanapat, singhag, pamuyboy ug pamalikas ang mga nag-unang hinungdan.

“So mahimong pakyas ang atong damgo, ang atong paningkamot para sa atong mga anak kung dili nato sila matagaan ug pagtagad aning mga edara. So nagpasalamat ko ninyo kay inyo silang gitagaan ug importansya aron mahimo silang model nga lungsoranon ug future leaders sa community,” matud pa ni Vice Gov. Paylaga. (R. Macalisang)